![](/web/cache/scene/uploads/fotos/foto/45d/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/62262e671d-dsc_0448-copia.jpg)
© Concello de Bueu
Ramiro Agulla 'instala' as súas esculturas na Sala Amalia Domínguez
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Neste mes de marzo, a mostra ‘Folerpas de papel caen devagar sobre fachos prendidos’, na que se recolle un dos últimos traballos de escultura do artista bueués Ramiro Agulla Menduíña, transforma a Sala de Exposicións Amalia Domínguez Búa de Bueu nunha instalación de arte conceptual.
A exposición, que traza unha reflexión sobre a desinformación e a soidade humana, concíbese como un ente vivo ao que se van incorporando diariamente elementos. Segundo explica o propio artista, "do que se trata é de que cada persoa entre na mostra e interprete o que se conta nela".
A exposición ensambla varios elementos, como esculturas, recortes de prensa, bloques de cemento e luz, para crear un microclima co que promover a reflexión entre os visitantes arredor do tempo actual.
Precisamente, este luns, Félix Juncal, alcalde de Bueu, e Xosé Leal, concelleiro de cultura, puideron gozar da exposición que consideran "moi potente e necesaria para os tempos que vivimos".
As persoas que queiran visitar a mostra poden dirixirse ao 2º andar da Casa do Concello de Bueu de 10.00 a 13.00 horas, ou escribir ao enderezo electrónico concello@concellodebueu.gal.