Orquestra de Cámara Lira, canteira de bos músicos pontevedreses
Por Anxo Lourido
Ensaian todos os sábados pola mañá no Pazo da Cultura dende as 11:00 ás 14:00 horas e están abertos a integrar mozos músicos da cidade que terán que someterse a unha proba de nivel. Trátase da Orquestra de Cámara Lira formada por 18 integrantes con idades comprendidas entre os 12 e os 20 anos.
Ao longo dos meses de novembro e decembro van afrontar un ciclo de música sacra: o 23 de novembro actuarán na Basílica de Santa María, o 30 de novembro na Igrexa de San Bartolomé e o 7 de decembro na Igrexa dos Praceres. Segundo sinalaba César Trabazo, presidente da agrupación, "estas igrexas teñen unha gran acústica". O director, Algirdas Pocius, indicou que varios dos integrantes da agrupación amplian estudos en Finlandia, Francia ou mesmo xa exercen de profesores no conservatorio de Barcelona.
Ademais, o 22 de decembro actuarán no Teatro Principal co Concerto de Nadal e o 25 de xaneiro de 2014 o Pazo da Cultura acollerá o Concerto X Aniversario da Orquestra de Cámara Lira coa colaboración da Orquestra Filharmónica Cidade de Pontevedra. Precisamente dous violinistas procedentes da Orquestra forman parte da Filharmónica. O director Javier Vicedo indicou que se están a conseguir éxitos que eran "impensables hai 15 ou 20 anos" e por iso aposta por unha Filharmónica profesional "material humano hai, agora o problema é o económico".