O grupo Seangles substitúe a 7 Setenta no concerto do domingo en Vilagarcía tras unha polémica co goberno local
Por Redacción
O grupo vilagarcián Seangles será o encargado de subirse ao escenario situado na Praza de Galicia en Vilagarcía este domingo 25 para facer un repaso de temas clásicos do rock nacional e internacional.
Seangles substitúe a 7 Setenta, o grupo que inicialmente estaba previsto que realizase o concerto nese espazo. O grupo 7 Setenta sinalou en Facebook que o trato recibido pola organización dependente do goberno local "é unha falta de respecto e un trato discriminatorio cara a nós e todos os grupos locais por extensión". As discrepancias céntranse no lugar de celebración do concerto e nas necesidades técnicas que non se axustaban ao que precisaban.
Pola súa banda, nun comunicado, o goberno local lamenta a suspensión pero culpa ao grupo de adoptar unha decisión de xeito unilateral e que nin sequera comunicaron ao Concello que di terse decatado a través dos medios de comunicación. Dende o goberno local indícase que se lle ofreceu toda a colaboración e facilidades. Ademais, sinala que se acordou o caché con eles e as necesidades e o custo do equipo de son.
Dende o Concello negan calquera tipo de trato discriminatorio respecto a 7 Setenta, advertindo que foi o único grupo local ao que lle aceptou un incremento do presuposto inicialmente acordado para poder contratar o equipo coas características que eles solicitaban.
Ademais, o goberno local indica que 66 colectivos locais participaron no programa das festas deste ano.
CONCERTO DE SEANGLES
Un destes grupos é Seangles que a partir das 22 horas do domingo 25 realizará un repaso dos grandes éxitos de grupos e solistas das décadas dos anos 70, 80 e 90.
Os membros da banda son Carlos Bao (guitarra e voces), Tatá del Río (guitarra e voces), José Modino (batería) e Isi Estévez (baixo e voces).