Música de Mozart e Mendelssohn no Principal
Por Redacción
A Orquestra de Cámara Barocco Sempre Giovane foi fundada en 2004 polo destacado violinista Josef Krecmer que tamén é o seu líder artístico. Conságrase particularmente na interpretación de composicións barrocas, sen deixar no esquecemento outros períodos estilísticos.
Os mellores músicos profesionais novos da República Checa pasan por este grupo que é invitado a festivais de música de importante nivel internacional como a Primavera de Praga, o Festival de Verán de Ohrid, o Festival Mitte Europa ou o Festival de Música Nitrianska Le Quattro Stagioni.
Algúns autores contemporáneos compuxeron obras expresamente para o grupo, caso de L.Sluka ou S.Hoínek. A Orquestra tamén realiza con frecuencia xiras polo estranxeiro, especialmente por Alemaña, Austria, España, Macedonia e Eslovaquia.
O programa do concerto está formado pola suite Holberg para orquestra de corda de Grieg, o concerto para piano e orquestra n.º 12 en La maior de Mozart, o concerto para violín, piano e orquestra de corda en Re menor de Mendelssohn e a serenata para orquestra de corda en Mi menor de Elgar.
A cita con este concerto organizado pola Sociedade Filharmónica de Pontevedra é ás oito e media da tarde no Teatro Principal.