O alumnado exhibe o seu talento no ciclo "O Conservatorio no Principal"
Por Redacción
Despois de darlle voltas durante moito tempo, o equipo directivo do Conservatorio Profesional de Música Manuel Quiroga de Pontevedra decidiu organizar audicións abertas ao público no Teatro Principal.
A experiencia "piloto" tivo lugar o pasado mes de novembro cultivando un "magnífico resultado" que lles animou a seguir con esta iniciativa que bautizaron como "O conservatorio no Principal".
Este mércores 19 de decembro, ás 20 horas, terá lugar un novo concerto no que se interpretará música clásica. As seguintes citas dentro deste ciclo están programadas para o 7 de febreiro e o 14 de marzo. Todos eles con entrada gratuíta.
A concelleira de Cultura, Carme Fouces presentou esta iniciativa acompañada de membros do equipo directivo e alumnos do conservatorio que valoraron positivamente esta experiencia desde o punto de vista profesional e académico.