O consulado británico autoriza a apertura do Cemiterio dos Ingleses a visitantes do roteiro literario de Vilagarcía
Por Redacción
Xa non quedan prazas para participar no roteiro literario deste sábado 1 de setembro en Vilagarcía de Arousa. Promovido pola Deputación de Pontevedra, este roteiro para 50 persoas transcurrirá por diferentes puntos da vila. Entre eles atópase o Cemiterio dos Ingleses, grazas á autorización do consulado británico que normalmente mantén pechado ao público este espazo pertencente á British Naval.
O escritor Marcos Calveiro será o encargado de exercer de guía e explicará anécdotas relacionadas coa súa novela 'O xardineiro dos ingleses'. Este mércores presentábase o roteiro coa presenza do deputado de Cultura, Xosé Leal; a concelleira de Cultura, Sonia Outón e o propio autor. A iniciativa conta coa colaboración da Asociación de escritoras e escritores en lingua galega.
Leal indicou que esta proposta busca que os espazos en que suceden as obras literarias galegas cobren vida a través destes roteiros. Neste caso, como indicou a concelleira, vai realizarse unha viaxe a primeiros do século XX, unha época próspera para o centro urbano de Vilagarcía, malia que dura para as zonas do rural arousán.
O roteiro comezará ás11.30 horas no Cemiterio dos Ingleses para despois pasar polo Salón Varietés, o Café e o Hotel Moderno, o Salón García, a Alameda e a Peixería, ademais da praia de Vistalegre, entre outros espazos.
O sábado 8 de setembro vai desenvolverse un novo traxecto en Cuntis dedicado á figura de Roberto Blanco Torres, cun proxecto guiado por Marcos Seixo. En posteriores sábados tamén están previstos percorridos por Vigo, Ribadumia, Meis, Barro, Tui e Bueu. Para inscribirse, só quedan prazas para os de Cuntis e Tui, é necesario enviar un correo electrónico a roteiros.cultura@depo.gal