O Café Moderno acolle a exposición de Wildlife "Fotógrafos da natureza 2016"
Por Redacción
Desde este 19 de outubro o Café Moderno Afundación de Pontevedra acolle a exposición "Fotógrafos da Natureza 2016. European Wildlife Photographer of the Year".
O concurso celebra o seu 24 aniversario cun total de 20.000 imaxes presentadas procedentes de 37 países europeos, o que o converte nun referente da fotografía da natureza deste continente tanto na súa vertente profesional como amateur.
Son fotografías sorprendentes, visualmente impactantes, poéticas e divertidas que nos levan a través da diversidade e a beleza da vida. Imaxes non manipuladas que emocionan e conciencian sobre a necesidade de preservar a natureza.
A obra gañadora desta edición, asinada polo noruegués Audun Rikardsen, mostra a unha orca emerxendo á superficie para respirar nunha mañá fría e escura.
De entrada libre e gratuíta, poderase visitar ata o 20 de xaneiro de luns a venres en horario de 17.30 a 20.30 horas e os sábados de 11.00 a 14.00 e de 17.30 a 20.30 horas.