A Escola de Gaitas Provincial de Pontevedra, vencedora na súa categoría na Liga Galega de Bandas
Por Redacción
A Escola de Gaitas Provincial de Pontevedra, con sede na capital, gañou este sábado a XXVI Liga Galega de Bandas de Gaitas, que se celebrou esta tarde na Cidade da Cultura, na súa categoría, a de segundo grao.
A fase final da Liga de Gaitas, organizada pola Federación Galega de Bandas de Gaitas e que conta co apoio da Consellería de Cultura, celebrouse este sábado na Cidade da Cultura de Galicia, en Santiago de Compostela.
A Liga Galega de Bandas de Gaitas, que se celebrou por vez primeira no ano 1990, contou coa participación de nove bandas na Fase Final, en concreto a da Escola de Gaitas Provincial de Pontevedra, Agarimo de Catabois e Agarimo de Catabois (B), Xuntanza de Cataluña e Xuntanza de Cataluña (B), San Xoán de Paramos, Mato Vizoso de Vilalba, Esgos e Tremiñado. A única da zona de Pontevedra foi a da Escola Provincial.
O conselleiro de Cultura, Román Rodríguez, participou no acto e recoñeceu o traballo das bandas de gaitas a prol da música popular galega, lembrando que exercen en moitos certames internacionais como embaixadores de Galicia noutros países e culturas. Gabou a calidade técnica das agrupacións finalistas e destacou a implicación de todos os participantes na protección e transmisión da música tradicional.
O presidente da Federación Galega de Gaitas, Hipólito Cabezas, puxo tamén en valor a importancia deste tipo de eventos que "representan unha oportunidade para que as bandas se fixen novos obxectivos técnicos e interpretativos, unha motivación para continuar nun proceso de esixencia continuo".
A banda Tremiñado (Ponteareas) resultou gañadora na categoría de primeiro grao, a principal das tres divisións nas que se organiza este certame competitivo, e banda de San Xoan de Paramos (Tui) no terceiro grao.