Castelao, Laxeiro e Leopoldo Nóvoa, referentes da exposición Segundo Gabinete de Curiosidades
Por Redacción
A galería About Art inaugura este xoves 6 ás 20.00 horas a exposición Segundo Gabinete de Curiosidades, realizada mediante fondos de coleccións privadas galegas, con obras de artistas de renome como Castelao, Luís Seoane, Leopoldo Nóvoa, Laxeiro, Quessada, Presas ou Rafael Alonso.
Entre os traballos poderanse ver do pontevedrés Rafael Alonso unhas pezas elaboradas durante a súa estancia en París, cando foi bolseiro pola Deputación nos anos 50. Mostrarase unha serie de debuxos inéditos dos lugares preferidos polo pintor na capital francesa, ademais de retratos ao natural de mulleres, vagabundos, autorretratos...
Tamén se poderán contemplar pinturas dos anos 50 de Leopoldo Nóvoa, moi escasas desde que no ano 1979 queimábase toda a súa obra no seu estudo de París. Castelao tamén estará presente cunha acuarela do ano 1942, agasallo do artista ao seu amigo Ramón de Valenzuela pola súa voda. Varias pezas de Laxeiro configuran outro dos atractivos cun retrato ao óleo de O Naranxo.
A mostra pódese visitar desde o xoves ata o 26 de maio, na rúa Pasantería 9, en horario de martes a venres desde as 17.30 ás 20.30 horas e os sábados de 11.00 a 14.00 horas.