As mil voces de Carlos Latre, este venres no Pazo da Cultura
Por Redacción
Carlos Latre, o home das mil voces, chega a Pontevedra. O cómico, considerado como un dos mellores imitadores que hai en España, presentará este venres 11 de novembro, a partir das nove da noite, o seu novo espectáculo de humor no Pazo da Cultura.
O show, titulado Carlos Latre In Live, ofrece un humor en maiúsculas e co selo tan característico do artista castellonenco.
Nuns 75 minutos, Latre repasa toda a actualidade política, social, cultural e deportiva do país. Case un centenar de personaxes soben ao escenario, a través da súa voz, nun espectáculo cheo de divertidos sketches.
Todo iso completado con música, coreografías e a actualidade máis próxima a cada localidade na que actúa. Un espectáculo apto para todos os públicos.
As entradas para este espectáculo están á venda a través de Ticketea. Teñen un prezo de 25 euros. En caso de non esgotarse poderán adquirirse no despacho de billetes do pazo dúas horas antes do inicio da función.