A arte dos vellos rockeiros
Por Redacción
Nacidos ambos en 1946, os profesores Fernando Casás e Juan Fernando de Laiglesia iniciaron hai preto de seis meses un intenso diálogo a través de correo electrónico con motivo de que, ao alcanzar os 70 anos, a ambos lles chegaba o momento de pór fin á súa etapa como docentes da Facultade de Belas Artes.
No marco desa conversa, xurdiu a idea de impulsar unha exposición conxunta que dese conta de proxectos e inquedanzas presentes nas súas traxectorias artísticas ao longo dos 25 anos nos que compartiron a tarefa docente.
Foi así como naceu 70 a exposición que na tarde deste xoves inaugurouse na Sala X da Facultade de Belas Artes e na que conflúen o interese de De Laiglesia por afondar na natureza das cousas e o traballo realizado por Casás tomando como base as formas da natureza.
"Ao cumprir ao mesmo tempo a idade que adoita coincidir coa retirada dos labores docentes, decidimos celebralo expoñéndoos publicamente ante a Universidade, o alumnado e o profesorado, con algúns dos resultados da nosa investigación en arte, realizada ao longo destes 25 anos de traballo na facultade", salienta De Laiglesia dunha mostra que, polo de agora, non será unha despedida, dado o seu nomeamento como profesor emérito e a continuidade de Casás como docente no presente curso.
"Ía ser o noso último acto dentro da facultade", engade este artista hispano-brasileiro dunha mostra que poderá visitarse ata o 9 de decembro e que se completa coa publicación dun catálogo, editado co apoio da Vicerreitoría de Investigación e Transferencia, no que se recollen todos eses textos que conforman unha conversa "sincera e sen ningunha máscara", que, como apunta De Laiglesia, "vertebra e dá razón" a moitas das obras que se reúnen na mostra.