Concha Velasco regresa a Pontevedra convertida en "Reina Juana"
Por Redacción
Unha única actriz sobre o escenario... pero vaia actriz. Concha Velasco, unha das intérpretes máis recoñecidas do panorama teatral español, é a protagonista de Reina Juana, a obra que se representará este sábado 22 de outubro, a partir das nove da noite, no Pazo da Cultura. Forma parte do ciclo Summum Teatro.
En Reina Juana, Concha Velasco convértese en Juana de Castela -máis coñecida como Juana la Loca-, un dos personaxes máis conmovedores da nosa historia, para contarnos as súas vivencias e, por suposto, render contas ás persoas que estiveron na súa vida, antes de morrer soa e afastada do que máis quería: os seus fillos.
Juana de Castela foi convertida nunha sombra, primeiro polo seu marido, Felipe o Fermoso; despois polo seu pai, Fernando o Católico, quen a reclúe en Tordesillas; e finalmente polo seu fillo Carlos V, que a ignora.
A obra, escrita por Ernesto Caballero e dirixida por Gerardo Vera, é un monólogo que presenta a Juana la Loca repasando a súa vida no momento da súa morte.
As entradas para este espectáculo, que teñen un prezo de quince euros, poden adquirirse en www.ataquilla.com. En caso de non esgotarse estarán dispoñibles no despacho de billetes do Pazo da Cultura unha hora antes do inicio da función.