Nataxa Retrankosky, de Orquídeas Pantasma, súmase ao cartel do PoioEscena 2013
Por Redacción
PoioEscena retoma a súa actividade coa segunda obra que ofrecerá este ciclo de teatro no seu novo formato. Orquídeas Pantasma, unha compañía de teatro afeccionado de recente creación, representará este venres 22 de febreiro ás 21:00 horas no Centro Cultural Xaime Illa de Raxó (Poio) a obra Nataxa Retrankosky, un trepidante e divertido percorrido polas emocións máis profundas e rídiculas dos soños e as crenzas dos seres humanos.
A pantasma de Nataxa Retrancosqui, a única amante de Lenin, é a protagonista da obra. Unha personaxe bipolar que vive ancorada no recordo do seu gran amor. Isto fai sentirlle importante e segura, moi diva. Pero cando recorda todo o que lle sucedeu sufriu unha estraña enfermidade: "ver o futuro". Esta loucura obrigouna a abandonar todo, ata o máis prezado, a súa filla con Lenin: Nataxa.
Nataxa Cerdeira vive para cumprir o seu soño, ir a Rusia. A ilusión invádea e realiza unha gala para recolectar cartos e material para emprender a súa viaxe. Sabe que os soños se poden cumprir. Entre sorrisos , bailes e lágrimas pasa amenizando a gala. Revela o seu segredo máis prezado: quere ir a Rusia para coñecer á súa tataravoa. Parece que con ilusión e fe todo se pode conseguir. Pero ¿Os soños son reais ou só son soños?
Orquídeas Pantasma substitúe na programación de PoioEscena ao grupo de teatro Titereficciós que, por motivos personais, non poderá participar este venres neste ciclo cultural.