Aínda que non deban, os vellos volverán namorarse no Teatro Principal
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/7b2/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/57da9b51b1-20160914-patxot-teatro-obra-celso-parada-002.jpg)
© Mónica Patxot
Cúmprense 75 anos da estrea de 'Os vellos non deben de namorarse' no Teatro Maio de Bos Aires. A coñecida obra teatral de Alfonso R. Castelao volverá representarse no Teatro Principal de Pontevedra, con motivo da programación prevista dentro dos actos do Ano Castelao. Será o vindeiro venres 30 de setembro ás 21.00 horas a través da compañía Teatro do Morcego.
O director da agrupación, Celso Parada, acompañado do deputado de Cultura, Xosé Leal e da concelleira de Cultura, Anxos Riveiro presentaba no mediodía deste xoves 15 as principais características desta montaxe que contará cunha repartición de dez intérpretes, entre os que figura o actor pontevedrés Mundo Villalustre e o propio Celso Parada.
O máximo representante de Teatro do Morcego apuntou que Castelao coñecera o teatro de Nikita Balieff en París no ano 1921 e quedara impresiondo pola modernidade das súas montaxes. Desta forma, recolleu no seu propio texto algúns deses elementos como a conversación entre os retratos dos pais do personaxe de Don Ramón, a utilización de máscaras ou do folclore musical.
A historia exposta en tres lances mostra a tese de que o vello que se namora a destempo é condenado polo pobo e vese abocado a enfrontarse ás convencións.
As entradas pódense adquirir a través de Ataquilla ao prezo de 5 euros. Tras esta función, o espectáculo será representado en Cambados, Illa de Arousa e Sanxenxo, entre outros puntos da provincia.