Búscanse os pinceis máis rápidos da parroquia de Arra
Por Redacción
A Asociación Cultural San Cayetano de Arra, en colaboración co Centro de Arte do Concello de Sanxenxo, organizan o I Certame de Pintura Rápida ao aire libre baixo o título "Arra como Antiga Parroquia", a celebrar o próximo día 31 de xullo.
Nesta iniciativa poderán participar todos os artistas que o desexen de forma gratuíta, previa inscrición electrónica a través do correo scarra.asociación@gmail.com, ou o mesmo día do certame no momento do selado dos lenzos en horario de 9 a 11 horas, na zona de aparcadoiro da praia de Montalvo.
As bases establecen dúas categorías. Unha infantil, para nenos de ata 16 anos, para os que haberá un primeiro e un segundo premio dotados con 100 e 50 euros en material de arte. E outra de adultos, para maiores de 16 anos, establécese un premio único dotado con 300 euros.
Aínda que o estilo e a técnica son libres, a organización si marca a temática, que versará sobre calquera lugar de Arra co obxectivo de poñer en valor a riqueza paisaxística e cultural da parroquia de Arra. Por iso, as obras deberán de ser realizadas in situ, dentro dos límites da antiga parroquia de Arra para o que os organizadores facilitarán aos participantes un plano da mesma, para que comuniquen o lugar no que se atopen realizando a súa obra e así poder visitalos en calquera momento e comprobar a evolución da mesma.
A totalidade das obras serán expostas nun recinto habilitado para o caso durante os días 6 e 7 de agosto en Montalvo. As obras premiadas pasarán a ser propiedade da asociación organizadora e as demais poderán ser retiradas ao finalizar a exposición o domingo día 7.