Alumnos do máster en Arte Contemporánea de Belas Artes enchen de imaxinación as escaleiras do Museo
Por Redacción
O alumnado do Máster en Arte Contemporánea, Creación e Investigación da Facultade de Belas Artes de Pontevedra é o protagonista da nova exposición que se pode visitar xa desde este venres no Sexto Edificio do Museo. Baixo o título 'Isto segue o seu curso. Polas escaleiras do Museo', a mostra ocupa os espazos de paso e tránsito do edificio museístico e moi particularmente as zonas das escaleiras.
A nova exposición inaugurouse este venres e poderá verse ata o 11 de setembro. Comisariada polos profesores da facultade de Belas Artes Xosé M. Buxán Bran e Mar Caldas, recolle obras de 21 artistas, tanto obra videográfica como fotografías, instalacións e debuxos.
A idea é que as obras se acheguen aos visitantes do Museo sen que teñan que ir na súa procura, senón que xa lle saian ao paso no transcurso da súa visita ao edificio, de modo que, de xeito orixinal e inédito, sitúanse tanto enriba como debaixo das escaleiras ou penduradas do teito.
Na inauguración participou o deputado provincial de Cultura e Lingua, Xosé Leal, que se dirixiu aos 21 artistas e lles indicou que son "os creadores do presente, e polo tanto, os do futuro", de modo que "a partires de hoxe estades chamadas a escribir, coa vosa obra, parte da historia da nosa sociedade". O deputado tamén fixo fincapé na tradición de apoio ás artes da Deputación de Pontevedra e asegurou que desde as administracións públicas se debe "fomentar todo avance cultural, xa que o como avancemos culturalmente será o que nos determine como sociedade".