Moz-Arte, un programa para dinamizar a arte entre os mozos de Bueu
Por Redacción
Dinamizar a arte entre a mocidade. É o obxectivo da primeira edición do Moz-Arte, un programa do Concello de Bueu co que se busca impulsar da creación como forma de comunicación.
Así o salientaron na rolda de prensa de presentación a concelleira de mocidade, Inmaculada Rodríguez, e o alcalde da vila, Félix Juncal, na que estiveron acompañados do muralista Santiago Martínez e do integrante de Comediantes sen senso, Daniel Chapela.
O Moz-Arte é unha mostra de arte urbana moi especial, de carácter dinámico e revulsivo dirixida aos mozos da vila, tal e como destacou a concelleira. A idea é que as xeracións novas se sintan partícipes, "que saiban que contamos con elas e con eles, para que amosen o seu potencial, para darlles voz".
A cita será o domingo 10 de xullo entre as 19.30 e as 23.30 horas na Praza Massó, a modo de velada de arte en directo, estruturándose en dúas partes ben diferenciadas.
A primeira está dedicada ás artes plásticas coa intervención en directo de catro muralistas que son ou foron alumnos da Escola de Artes Pablo Picasso da Coruña, e entre os que están o artista buenense Santiago Martínez e Ana Davila, deseñadora do cartel.
Ademais, esta sección inclúe unha sorpresa; xa que aqueles que o desexen poderán participar activamente e pintar nun mural de elaboración común, no que deixar pegada da súa creatividade.
Ás 21.30 horas comezará a segunda parte, conformada polas artes escénicas. Será o momento da dramaturxia e os integrantes do grupo de teatro do IES Johán Carballeira, Comediantes Anónimos, poñerán a nota de humor cunha peza de Jose Luís Alonso de Santos titulada Cadros de amor e humor ao fresco, unha serie de sketches cuxo tema central son as relacións de parella, as infidelidades e algunhas das súas consecuencias.
Seguidamente, será a quenda de Tales of Monkeys, un grupo de indie-folk galego que destaca especialmente pola sensibilidade do seu estilo e dos seus temas, que nacen non só da inspiración, senón tamén da formación musical dos seus compoñentes.