O Festival de Curtametraxes de Bueu adéntrase nas propostas sociais
Por Redacción
Manuel Pena, director do Festival Internacional de Curtametraxes de Bueu (FIC-Bueu), quere devolver o agarimo e o apoio que levan recibindo no últimos nove anos na organización deste certame filmíco a través dun plan de actuacións para colectivos que normalmente non pode acudir ao festival. Así presentaba o máximo responsable do FIC-Bueu o programa de actuacións que van desenvolver nos próximos meses, acompañado polo deputado responsable de Cultura, Xosé Leal.
Desta forma teñen previsto que as persoas da terceira idade dos centros de día Anduriña e Pescadoira de Bueu poidan ver unha vez ao mes curtametraxes que se adapten ás súas características sociodemográficas que se complemente con actividades para traballar a memoria e estimular a imaxinación. Con esta idea quérense potenciar os fins terapéuticos combinados co lecer.
Tamén usuarios da Asociación Xoán XXIII en Cangas poidan participar nun taller cinematográfico durante tres semanas para coñecer como son as fases dunha rodaxe. E na Unidade de Pediatría do Álvaro Cunqueiro en Vigo habilitarase unha sala de cinema para que os menores hospitalizados poidan ver unha proxección mensual de curtametraxes adaptadas á súa idade.
O FIC-Bueu desenvolverase entre o 10 e o 17 de setembro na vila do Morrazo. O 15 de xuño coñeceranse os sesenta títulos que se integrarán na sección oficial, seleccionados entre máis de 1.460 filmes chegados desde 97 países para participar nesta edición.