Unha lectura de textos de Manuel María, acto central das Letras Galegas en Sanxenxo
Por Redacción
Sanxenxo ten deseñada unha ampla programación cultural con motivo da celebración do día das Letras Galegas, dedicado este ano ao poeta Manuel María.
Os actos comezarán o luns día 16 cunha conferencia sobre Manuel María que correrá a cargo de Adela Leiro, mestra xubilada e escritora de recoñecido prestixio en Galicia. Terá lugar ás 21 horas na Sala Nauta, onde tamén o luns se inaugurará unha exposición sobre a vida e a obra de Manuel María, que poderá ser visitada ata o 20 de maio e que é organizada en coordinación por Adela Leiro, a asociación Soalleira de Dorrón e a concellería de Cultura.
O martes 17 de maio será o día grande das celebracións. A asociación cultural Andarela deseñou unha actividade que baixo o nome de Espertar en galego tratará de sorprender aos veciños coa colocación de carteis en todas as parroquias con verbas enxebres e frases dos poemas de Manuel María.
A asociación de veciños de San Juan de Dorrón programa para este día a III Marcha Cicloturística a Dorrón, que percorrerá diferentes lugares da parroquia, sobre todo pola carretera interior e por pistas rurais. A marcha partirá do colexio de Magaláns.
A partir das 12 da mañá a actividade concentrarase na Praza Pascual Veiga, onde se procederá a facer unha lectura pública de textos de Manuel María, na que participarán personaxes públicos. Será o grupo musical Onte e Hoxe, formado por tres músicos da comarca (Itziar Solla, Víctor Bóveda e Roberto Fernández Lores), o que porá música e son aos poemas de Manuel María.
Tras o concerto terá lugar a entrega dos premios do Certame Literario Picariños, organizado polo Centro Cultural e Deportivo Sanxenxo e que nesta edición contou con máis de 60 participantes. Trátase dun certame escolar en honor da memoria do mestre Hermida que se desenvolve nas modalidades de narrativa e poesía e con dous premios individuais por cada una das modalidades convocadas.
O acto na Praza Pascual Veiga rematará coa interpretación por parte da Banda de Música de Sanxenxo do himno galego.
Xa pola tarde, a Praza de Vilalonga acollerá un Serán, a partir das 17 horas, a cargo da asociación Os Cruceiros, no que actuarán tódolos grupos deste colectivo.
En Sanxenxo, na Praza Pascual Veiga, ás 17.30 horas, a asociación cultural Abiñadoira encargarase de coordinar unha tarde xogos que baixo o título de A búsqueda das palabras perdidas ofrecerá actividades en grupo para rapaces, con diferentes probas que deberán superar para fomentar o uso do galego nos nenos.
Ás 18 horas será Noalla quen celebre o seu Festival das Letras Galegas da man do coro parroquial, que interpretará diferentes pezas na casa forestal de As Canteiras.
Portonovo, pola súa parte, porá fin ás celebracións do día 17 de maio cun Festival das Letras Galegas a cargo da coral polifónica Santa María Adina de Portonovo e Os Gatiños, que se desenvolverá no CEIP de Portonovo.
Relacionadas:
-
Axenda do día das Letras Galegas na comarca
Por Redacción |
-
Xosé Constenla ofrece un concerto en Marín con motivo do Día das Letras Galegas
Por Redacción |
-
A Carreira Popular pola Lingua abrirá os actos do Día das Letras Galegas en Poio
Por Redacción |
-
Bueu estende a celebracións das letras galegas máis alá do 17 de maio
Por Redacción |