A Carreira Popular pola Lingua abrirá os actos do Día das Letras Galegas en Poio
Por Redacción
Poio contará con diversos actos para celebrar o Día das Letras Galegas durante o vindeiro martes 17. O primeiro será ás 11.00 horas no Peirao de Raxó co inicio da Carreira Popular Pola Lingua, dirixida aos menores e que se desenvolverá nun circuíto totalmente urbano. Esta carreira realízase por un paseo marítimo e cun centro urbano de Raxó, con saída e chegada no porto. A proba desenvólvese con seis categorías, unha máis que en anos anteriores, coa posibilidade de que participen corredores desde os 3 ata os 18 anos, ademais de establecerse unha categoría senior.
Os tres primeiros clasificados de cada categoría recibirán un trofeo, excepto na categoría senior que só o recibirá o gañador, ademais dun lote de libros de Manuel María. Todos os participantes recibirán unha medalla conmemorativa.
Ás 17.30 horas, o salón de actos do Centro Cultural Xaime Illa Couto de Raxó acollerá unha charla conferencia coa participación de Tamara Andrés, escritora e poetisa de Poio. Ademais entregaranse os premios do Concurso Literario Xaime Illa Couto coa lectura das obras galardoadas. O acto pecharase cun himno interpretado pola Escola de Música tradicional de Poio.
As actividades continuarán o sábado 21 no mesmo Centro Cultural cunha sesión de contacontos a partir das 11.30 horas a cargo de Andrea Vázquez. A partir das 21.00 horas, representarase a obra teatral 'O de menos é ou nome'.
Estes actos foron presentados este venres 13 polo alcalde de Poio, Luciano Sobral e pola concelleira de Cultura, Lidia Salgueiro, acompañados polo representante da SCD Raxó, Xaquín Agulla. Salgueiro indicou que o 17 de maio segue sendo unha data reivindicativa debido a que a lingua galega segue relegada. Neste sentido, lembrou que presentaron unha moción para que a Xunta de Galicia cumpra coa Carta Europea das Linguas Rexionais e Minoritarias.
Ao mesmo tempo lembraron que ata finais de mes permanecerán abertas dúas exposicións sobre Manuel María no IES de Poio e no Centro Xaime Illa Couto.