Xosé Constenla ofrece un concerto en Marín con motivo do Día das Letras Galegas
Por Redacción
Xosé Constenla é un cantautor compostelán que combina a súa actividade de geógrafo e de profesor na Facultade de Ciencias da Educación en Ourense coa súa faceta musical. A asociación Queremos Galego Marín e Ateneo Santa Ceclilia pensaron neste artista para celebrar conxuntamente o Día das Letras Galegas en Marín cun concerto que se desenvolverá a partir das 20:30 horas, no local do Ateneo Santa Cecilia.
Despois de gañar varios premios literarios, Xosé Constenla comezou a tomar contacto coa música de grandes cantautores ibéricos e latinoamericanos, como Silvio Rodríguez ou Luis Eduardo Aute. A súa música caracterízase polas letras elaboradas e polas melodías que mostran distintos estados de ánimo e impresións sobre o acontecer social.
Constenla publicou catro discos e na xira que está a levar a cabo por Galicia presenta o seu último traballo discográfico Virada por avante, unha gravación con once temas de gran influencia folk-rock americana e tamén de corrente iberoamericana.
Para acceder ao recinto na rúa Caracol de Marín é necesario doar 3 euros no caso dos socios e 4 euros para aquelas persoas que non pertenzan ás entidades organizativas. Este importe será destinado a sufragar os gastos dos intérpretes.