O músico Tino Baz actúa no 'Venres do Ateneo' en Marín
Por Redacción
O músico da Guarda, gaiteiro e cantante, Tino Baz, ofrece este venres 6 un recital no Ateneo Santa Cecilia de Marín, ás 21.00 horas. Este artista ofrecerá a súa particular visión da canción no que respecta ao tratamento vocal, a utilización de instrumentos populares e á especial forma de interpretar textos poéticos cantados, algúns recolleitos da literatura galega.
Da súa discografía destaca o álbum 'Cinsa namorada', gravado en 2008, que foi o seu primeiro traballo en solitario despois de colaborar con diferentes grupos da música galega actual. O seu estilo destaca polo marcado acento tradicional, adaptado ás acústicas innovadoras actuais.
Baz conta cunha importante traxectoria na que impartiu concertos pedagóxicos, obradoiros de instrumentos populares e charlas sobre o valor da música. Ademais, este músico pontevedrés é un comprometido activista a favor da normalización da lingua e da cultura galega.
Os socios do Ateneo terán que achegar 3 euros, mentres que os non socios deberán abonar 4 euros.