Polo Día do Libro, ir ao Museo inclúe un agasallo
Por Redacción
No Día Internacional do Libro, o Museo de Pontevedra contribuirá á celebración agasallando cun volume a todas as persoas que acudan a visitar as súas coleccións e exposicións. Unha vez finalizada a visita, as persoas que o desexen poderán solicitar no mostrador do hall o exemplar, pertencente ao catálogo editorial do propio Museo.
A iniciativa afectará a todas as persoas que visiten no horario habitual de apertura, entre as 10.00 e as 21.00 horas, o Sexto Edificio e o Edificio Sarmiento, os edificios que albergan tanto as coleccións permanentes como as salas de exposicións temporais. As tres salas de exposicións temporais acollen desde o pasado 1 de abril a gran exposición 'Castelao Artista. Os fundamentos do seu estilo (1905-1920)', da que os sábados pola tarde, ás 19.00 horas, se realiza a visita guiada.
O fondo editorial do Museo está composto por monografías sobre os fondos propios e catálogos relativos a exposicións temporais celebradas. A través destas publicacións preténdese difundir tanto a labor que se realiza na institución museística, promovendo un mellor coñecemento das coleccións e das propostas expositivas que se ofrecen.
O deputado provincial de Cultura e Lingua, Xosé Leal, valorou a iniciativa porque nun día de "vital importancia" cultural a nivel mundial, desde a Deputación tamén queren contribuír á valorización do libro en galego e ao fomento do hábito da lectura.