"A praia dos afogados", primeira cita no Grove co ciclo Cinemas de Galicia
Por Redacción
A praia dos afogados, filme galego dirixido por Gerardo Herrero, iniciará o próximo día 16 de abril as proxeccións no Grove do programa Cinemas de Galicia. A película poderase ver na Casa da Cultura Manuel Lueiro Rey ás oito da tarde.
Así o anunciaron na presentación desta iniciativa cultural o alcalde José Antonio Cacabelos, o director da Agadic, Jacobo Sutil; e a concelleira de Cultura, Emma Torres.
Seguiranlle as proxeccións de A tropa de trapo na selva do arco da vella, de Álex Colls (30 de abril); A cicatriz branca, de Margarita Ledo (7 de maio); Os fenómenos, de Alfonso Zarauza (21 de maio), e O noso último verán en Escocia, de Andy Hamilton e Guy Jenkin (4 de xuño), tamén nese mesmo escenario.
A carpa instalada na praza do Corgo acollerá o resto da programación, que se desenvolverá de outubro a novembro.
Neste segundo período de proxeccións, poderanse ver no Grove as cintas 9 ondas, de Simone Saibene (2 de outubro), Maimiño e o espello máxico, de Ernesto Padrón (23 de outubro); Arraianos, de Eloy Enciso (30 de outubro); Encallados, de Alfonso Zarauza (6 de novembro); e Meigallos, de Virginia Curiá (20 de novembro).
Nesta terceira edición, Cinemas de Galicia mantén o mesmo dobre obxectivo co que botou a andar como experiencia piloto en 2014: incrementar o número de salas cinematográficas da comunidade e ofrecerlles novas posibilidades de distribución aos filmes galegos que se atopan en fase de explotación comercial.
Ao tempo, o circuíto contribúe a fomentar o hábito de ver cinema en pantalla grande, funcionando como complemento á actual oferta das salas comerciais, así como ao labor de difusión e de creación de públicos que tamén desenvolven os diferentes cineclubes galegos.