O Grove incorpórase ao circuíto Cinemas de Galicia
Por Redacción
O Grove volverá a ter unha programación cinematográfica estable ao longo do ano. O municipio meco incorporouse ao programa Cinemas de Galicia, organizado pola Axencia Galega de Industrias Culturais (Agadic).
O convenio, que se asinou este venres na Cidade da Cultura, terá validez ao longo de todo 2016 e facilita un amplo catálogo de películas para a súa exhibición en dependencias municipais.
No caso do Grove as películas serán proxectadas na Casa da Cultura, feito para o cal será preciso mellorar a pantalla existente. A entrada está fixada en tres euros e a programación concretarase nos vindeiros días coa proxección dun filme cada dúas semanas.
Esta actividade é financiada entre a Agadic e o Concello facéndose cargo cada un deles do 50% dos dereitos de exhibición.
Trátase dun proxecto que xa funcionou en outras localidades en anos anteriores e que pretende achegar o cine a aqueles concellos que non contan con salas comerciais.
Ao tempo o catálogo dispoñible contribúe a difusión do cine feito en Galicia e doutros cinemas europeos polo que supón unha oportunidade para achegarse a produtos máis difíciles de consumidor en circuítos comerciais tradicionais.
37 PELÍCULAS EN CATÁLOGO
A nova versión do catálogo confeccionado pola Agadic conta cun total de 37 filmes: 29 producións con participación galega e oito destacados títulos do actual panorama cinematográfico español e europeo.
As películas galegas desta escolma son: '9 ondas', 'A árbore magnética', 'A arca de Noé', 'A cicatriz blanca', 'A praia dos afogados', 'A Tropa de Trapo na selva do arco da vella', 'A viaxe de Leslie', 'A viaxe dos Chévere', 'Arraianos', 'As altas presións', 'Costa da Morte', 'En todas as mans', 'Encallados', 'Funes, o inventor da Lúa', 'Inevitable', 'Lobos sucios', 'Maimiño e o espello máxico', 'Meigallos', 'Noite ¿de paz?. Holy Night!', 'O clube dos incomprendidos', 'O instante eterno', 'O ouro do tempo', 'O raio', 'Os días afogados', 'Os fenómenos', 'Os incribles', 'Piedad', 'Schimbare' e 'Torre de Breoghán'.
O cinema español e europeo está representado neste catálogo polas longametraxes 'Diplomacia', 'Loreak', 'Macbeth', 'El mundo sigue', 'Nuestro último verano en Escocia', 'Phoenix', 'Rams (el valle de los carneros)' y 'Techo y comida'.