Concerto de La Bellemont no Teatro Principal
Por Redacción
O vindeiro luns día 29 ás 20:30 horas, no Teatro Principal, a Sociedade Filarmónica de Pontevedra ofrecerá aos seus socios un concerto de música barroca que estará a cargo do grupo La Bellemont.
Formado polos músicos Sara Ruiz (viola da gamba), Laura Porto (órgano) e Rafael Muñoz (tiorba, archilaúd e dirección), e coa participación das sopranos Delia Agúndez e Magdalena Padilla e do barítono Jesús García Aréjula, La Bellemont ofrecerá no programa un percorrido polos Motetes e Lamentacións de François Couperin (1668-1733), así como a súa música instrumental ou a dos seus contemporáneos Sainte-Colombe ou Nivers.
La Bellemont nace no ano 2007 da unión de Sara Ruiz, Rafael Muñoz e Laura Porto, tres músicos fascinados polo repertorio barroco francés.
Marcados pola procura dun son con identidade, un xesto e unha articulación conxuntos, os músicos de La Bellemont concretan esta filosofía co seu primeiro disco La voix de la viole, un programa dedicado á música para viola da gamba e baixo continuo de Marin Marais.
A crítica especializada outorga a este disco cinco diapasones (revista Diapason) e as catro estrelas da revista Classica. O seu segundo disco Plaisir sacré, dedicado aos motetes de François Couperin, xa foi galardoado coa R (recomendado) da revista Ritmo, co "Melómano de ouro" da revista Melómano e coa "E" (excepcional) da revista Scherzo.
La Bellemont foi nomeado como mellor grupo barroco e Plaisir sacré como mellor produción discográfica na primeira edición dos premios GEMA.
Plaisir sacré, programa que ofrecerán na Sociedade Filarmónica de Pontevedra, foi ademais recentemente nomeado como mellor disco vocal francés nos ICMA (Intenational Classical Music Awards). No verán de 2016 sairá á luz o seu novo proxecto discográfico dedicado ás "Piéces de viole" de François Couperin.