Bandas sonoras e un encontro entre directores darán paso á gala do FICBUEU 2015
Por Redacción
Temas de películas tan coñecidas como 'O rei león', 'Ghost' ou 'Gladiator' soarán este sábado 12 no concerto que a Banda de Música Artística de Bueu ofrecerá dentro das actividades complementarias que se organizan no marco do oitavo Festival Internacional de Curtametraxes de Bueu (FICBUEU). Comezará ás 20.00 horas nos exteriores do edificio do Centro Social do Mar.
Durante o sábado, a asociación de realizadores Crea organiza tamén un novo encontro no que se darán cita directores galegos e internacionais. Será a partir das 18.00 horas no pub 'De cañas con Crea' coa participación de Gonzalo Suárez, Nani Matos, Samuel Lema, José Antonio Blanco ou Álvaro Gago. Estas propostas serán previas á cerimonia de clausura do certame organizado pola Concellería de Cultura, que se iniciará a partir das 21.30 horas no Centro Social do Mar.
Esta cita coas curtametraxes continúa contando cunha ampla presenza de público que terá oportunidade este venres de poder ver en dobre sesión, ás 20.00 e ás 22.00 horas, as películas 'Véndese', un thriller galego protagonizado por Carlos Branco e Xúlio Abonjo, 'Pequeno bloque de cemento con pelo alborotado contendo o mar', 'Arta', 'Whale Valley', 'The bigger picture' e 'A gran invención'.