Gafas e Pallaso, unha webserie de humor absurdo e con alma pontevedresa
Por Redacción
A Facultade de Ciencias Sociais e da Comunicación segue a ser o xermolo das producións audiovisuais de moda, as webseries. O último exemplo é Gafas e Pallaso, unha ficción de humor absurdo que acadou máis de 30.000 reproducións en YouTube cos seus dous primeiros episodios.
"Para ser unha webserie en galego de humor absurdo, na que os protagonistas son un pallaso mal pintado e un tío con gafas, a verdade é que a acollida que estamos a ter non está nada mal", destaca Alexandre Pita, un estudante do campus pontevedrés que impulsou esta webserie xunto cun grupo de amigos.
El é produtor e guionista dunha serie que puxo en marcha xunto co director e produtor Perico Galbán e un equipo que completan Duarte Galbán, Román Castaño, Denís García, Xan Raña, Xulián Sambade, Andrés Gallego e Eva Veiras.
O proxecto naceu hai case dous anos como a idea dun grupo de amigos para "facer algo diferente no mundo das webseries en galego e, sobre todo, de facer algo noso". Nun principio, di, "queríamos facer vídeos curtos para Youtube, algo moi sinxelo e rápido de gravar, pero a medida que se foi confeccionando o equipo, foron chegando novas ideas e a serie medrou ata o que é hoxe".
Foi no pasado mes de marzo cando este grupo de mozos lanzou á rede o primeiro capítulo dos capítulos desta webserie, dirixida a "todo aquel que queira pasar un rato divertido con pallasos, tíos con gafas, extraterrestres ou viaxes no tempo". Segundo relata Pita, "a idea é facer un total de cinco capítulos, e logo xa veremos que pasa", e con ese propósito, moi pronto teñen previsto estrear a terceira entrega dunha webserie que levan a cabo cos seus propios recursos.
E é que pouco a pouco, o proxecto de Gafas e Pallaso foi medrando e gañando popularidade, contando coa colaboración nas súas rodaxes de cómicos como Berto Romero ou Dani Mateo e de actores galegos como Miguel de Lira ou Xosé Antonio Touriñán. Con todo iso, "estamos a aprender moito", ao tempo que lles está a permitir dotarse duns recursos que, nun futuro, "agardamos que nos sexan de grande axuda" no mundo do audiovisual.