Últimos días para visitar a mostra de pintura galega en Sanxenxo con obras de Lugrís, Seoane ou Laxeiro
Por Redacción
A exposición "Mestres da pintura galega" organizada pola galeríaJosé Lorenzo na Sala de Exposicións Náutico Sanxenxo de Afundación Abanca pódese visitar ata o 15 de agosto con máis de 60 obras que ofrecen creacións de destacados autores da arte galega.
Esta mostra caracterízase por ofrecer aos visitantes traballos dos artistas máis significativos da plástica galega contemporánea. Os asistentes poden gozar de obras de autores tan representantivos como Laxeiro, Urbano Lugrís, Eugenio Granell, Arturo Souto ou Luis Seoane. As obras están dispoñibles para a súa venda.
A exposición comeza no primeiro cuarto do século XX cunha serie de pinturas que poñen de manifesto o folclorismo vixente en Galicia nese momento. Dese período destaca unha escena de Manuel Abelenda.
Tamén se recolle o movemento renovador con obras de Torres, Souto ou Manuel Pesqueira, ademais dun arranque de parede de Urbano Lugrís.
A mostra tamén permite realizar un interesante percorrido por varios temas, técnicas e formatos da obra de Luis Seoane dende as súas paisaxes dos anos 40 ás escenas de mulleres das décadas dos 60 e 70.
Ao longo desta exposición tamén se poden comprobar pezas escultóricas entre as que destacan bronces de Xoán Piñeiro e de Camilo Otero.