Cultura no Camiño encherá a Praza do Teucro con teatro infantil entre o 20 e o 26 de xullo
Por Redacción
Pontevedra acollerá entre os días 20 e 26 de xullo sete espectáculos de teatro dirixidos ao público infantil. ÿ a proposta que recolle o ciclo Cultura no Camiño para a cidade do Lérez. Trátase dunha programación cultural, impulsada pola Axencia Galega das Industrias Culturais (Agadic) e Turismo de Galicia, que se estende polos 93 concellos situados nas diferentes rutas xacobeas da nosa comunidade.
Na súa terceira edición, o programa xurdido ao abeiro da conmemoración do VIII Centenario da Peregrinación de San Francisco de Asís a Compostela, despregará unha carteleira de 316 actuacións escénicas e musicais, protagonizadas por 138 formacións artísticas galegas.
No caso da cidade de Pontevedra, a programación é a seguinte:
- 20 de xullo: As mil e unha noites, de Ghazafelhos Teatro.
- 21 de xullo: De troula en troula, de A illa dos nenos.
- 22 de xullo: O bufón do reino, de Pinga Teatro.
- 23 de xullo: Uxía lambona e a banda molona, de Troula.
- 24 de xullo: Pan de millo: Vai ser boa!, de Migallas Teatro.
- 25 de xullo: Rodarirrodari, de Fantoches Baj.
- 26 de xullo: Os xogos de Paporrubio, de Paporrubio.
Todas as actuacións serán ás sete e media da tarde na Praza do Teucro.
Neste sentido, articúlase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional en Galicia.
Conta un orzamento superior aos 500.000 euros e no seu financiamento participan tamén os respectivos concellos, asumindo estes unha parte dos cachés artísticos.
O calendario de actuacións para todos os concellos estará dispoñible para a súa consulta no web da Agadic.