Poio buscará nun novo concurso ao mellor monologuista cómico de Galicia
Por Redacción
PoioEscena ábrese a outras modalidades das artes escénicas. No marco deste ciclo de teatro afeccionado, os seus organizadores incluirán por vez primeira os monólogos de humor. Así, están a impulsar un concurso que pretende buscar ao mellor cómico de Galicia nesta especialidade artística.
Neste concurso de monólogos poderán participar as persoas maiores de 16 anos, ás quen PoioEscena cederá o seu escenario para que amosen o enxeño, o talento e a creatividade dos cómicos que hai na nosa terra. Ao mesmo tempo, sinalan, buscan achegar ao público unha nova oferta de espectáculos que se suman á programación anual de teatro.
O prazo de inscrición xa está aberto e rematará o mércores 15 de abril. O concurso desenvolverase en dúas xornadas, ambas abertas ao público: unha fase previa o 17 de abril, na que se escollerán tres finalistas, e unha final que se celebrará o venres 8 de maio, e da que sairán os gañadores do concurso.
Haberá un máximo de doce participantes. De haber máis inscritos farase unha selección previa en base ao texto do monólogo, que debe ser orixinal e inédito e non ser unha tradución ou adaptación de obras xa coñecidas. A actuación de cada cómico será dun máximo de quince minutos.
O xurado deste certame, que terá lugar no Centro Cultural Xaime Illa de Raxó, estará composto por persoeiros do mundo do teatro e das artes escénicas e por unha representación da organización, con voz pero sen voto.
O premio para o gañador será de 500 euros. O segundo clasificado gañará 300 e outros 200 serán para o terceiro clasificado.
Con esta nova iniciativa, os organizadores de PoioEscena (SCD Samieira, SCD Raxó, ACDeM e a Concellaría de Cultura do Concello de Poio) afondan no seu obxectivo de fomentar o interese do público xeral polo teatro e contribuír á promoción e difusión das artes escénicas en galego, dando a coñecer o traballo feito en Galicia polos profesionais e afeccionados do teatro.