Presentan no Principal a máquina de facer Xustiza
Por Oskar Viéitez
O Concello de Pontevedra acolleu a presentación da sátira Dura Lex, con Pepe Penabade, prevista para este xoves 22 de xaneiro no Teatro Principal de Pontevedra para as 21.00 horas. Despois do monólogo darase paso a un coloquio co xuiz Xermán Varela, membro de Xuíces pola Democracia, e o avogado de Esculca, Guillerme Presas.
Segundo avanzaron na rolda de prensa, a representación conta a historia do xuíz Salomón da Silva, que convoca un acto promocional para presentar un invento revolucionario, a DURA LEX PRO 1.0, a máquina de facer xustiza. Vítima dunha conspiración urdida nas intrincadas canalizacións do poder xudicial, o xuíz Salomón da Silva quere redimirse dando a coñecer o froito de máis de vinte anos de traballo e investigación.
Entre as variadas prestacións do invento destaca a súa axilidade no procesamento de condutas delictivas, a súa economía de medios facilitada pola supresión de fiscais, avogados, procuradores e outros roles xurídicos, e a súa irreprochable imparcialidade mecánica. O noso xuíz ofrece á sociedade a solución perfecta a todas as imperfeccións do sistema xudicial.
A función está organizada en colaboración co Observatorio dos dereitos e das liberdades, Esculca.
A entradas están á venda en Servinova a un prezo de 8 euros (4 euros para estudantes, parados e xubilados) e o propio día da función unha hora antes na billeteira.