O arousán Carlos Blanco, mellor actor do XXIV Festival de Aguilar de Campoo (Palencia)
Por Alejandro Espiño
O actor galego Carlos Blanco (Vilagarcía de Arousa, 1959) gañou o premio ao mellor actor no XXIV Festival de Aguilar de Campoo (Palencia), polo seu traballo na curtametraxe Desayuno con diadema, de ÿscar Bernacer. Unha produción que colleitou numerosos premios nos últimos meses e que está considerada por algúns críticos como un dos principais candidatos aos próximos Premios Goya 2013.
En Desayuno con diadema, unha curtametraxe rodada en Valencia, Carlos Blanco dá vida a Enrique, un home que se esperta na súa cama á beira de Aurora (Rosario Pardo). Pasaron xuntos unha inusual noite na que se desinhibiron por completo. Embriágalles a idea de sentirse vivos, pero senten terror ante a posibilidade de cambio, do que dirán, de ir contra aquilo que consideran "o establecido".
Ao espertar, e sen saber moi ben os pasos a seguir, Enrique decide preparar un almorzo para dous. Facía anos que non compartía o almorzo con ninguén. Será algo moi especial para el e, sen sabelo, tamén para ela. Poida que este sexa o primeiro paso para subirse ao tren que tanto un como outro levan anos esperando.
O premio a Carlos Blanco non foi o único con acento galego. Neste certame tamén resultou vencedor o compositor coruñés Nani García pola banda sonora da obra O Xigante, dirixida por Luís da Matta Almeida.