O mundo rural do Miño visto polo portugués Ricardo de Campos, ata o 13 de novembro en About Art
Por Redacción
Ricardo de Campos volve a About Art Por segunda vez, o artista portugués expoñerá a súa obra na galería pontevedresa. Será cunha mostra que poderá visitarse a partir do próximo xoves 30 de outubro, ás 20.00 horas. Estará aberta ata o 13 de novembro.
Nesta ocasión, preséntase unha instalación pictórica realizada ex profeso para expoñerse en Pontevedra e que toma como escenario o mundo rural do Miño.
Nestas obras, o artista presenta a súa identidade marcada pola realidade rústica e relixiosa, unha memoria visual que recorda, a través das mulleres do pobo, os animais da montaña, mitos e ritos, fetiches e supersticións, unha mensaxe do social, onde o drama da existencia humana e a condición espiritual se pende sobre os rostros, que son símbolos iconográficos comúns na súa linguaxe pictórica.
Ricardo de Campos naceu en Monçao (Portugal) en 1977 e debutou no campo artístico da man de Antonio Guedes en 1994. Cursou estudos orientado por Alberto Péssimo en 2003 e empezou a traballar ao ano seguinte co escultor José Rodrigues, quen foi para el unha das máximas referencias a hora de abordar o deseño dos seus traballos. O propio Campos engade sobre a súa traxectoria a grande importancia que tivo para a súa creatividade a figura de Graça Morais.
Tras varios anos formándose en diferentes escolas artísticas, a súa obra empeza a ter novas influencias como o expresionismo alemán, a arte póvera ou o informalismo europeo; e o uso de materiais cotiáns tórnanse recorrentes na súa obra. Tamén se fai notoria a influencia de nomes como Robert Rauschenberg, Anselm Kiefer ou Neo Rauch e, especialmente, Antonio Saura e mesmo as pinturas negras de Goya na súa obra de iconografía relixiosa.
A exposición na galería About Art poderase visitar de martes a venres de 10 a 13 horas e os sábados de 11 a 14 horas.