30 anos "De amor, dor e loita" con A Quenlla, este venres no Teatro Principal
Por Alejandro Espiño
30 anos de carreira reunidos nun disco. ÿ o que ofrece A Quenlla en De amor, dor e loita. Pero a nova aposta musical desta mítica banda galega non é un recompilatorio. Catro anos despois do seu último álbum ...unha vez foi outrebón, publican este disco no que reúnen 26 cancións inéditas, "que non se gravaron antes por exceso de produción", segundo explicaron este martes os compoñentes do grupo no Concello de Pontevedra.
Acudían á cidade para promover o concerto que protagonizarán este venres 17 de outubro, ás 21.00 horas, no Teatro Principal. Nel presentarán este último disco, no que esta vez non hai temas tradicionais, senón de autores como Cunqueiro, Curros Enríquez, Darío Xohán Cabana, Xesús Rábade, Manuel María, Lois Diéguez ou Xosé María Díaz Castro, "xente que lle quería ben á nosa terra".
A través deles, A Quenlla mantén a súa aposta de utilizar exclusivamente "a nosa lingua e a nosa cultura", segundo sinalaron Xosé Luis Rivas e Baldomero Iglesias, coñecidos popularmente como Mini e Mero, amosando "a nosa parte combativa, de defensa da nosa cultura", unha postura que trata de ser intransixente "coa colonización que estamos a sufrir" e ante a que insisten en mostrar unha loita "permanente" pola dignidade como pobo.
Neste sentido, destacaron que "este país ten cultura, pero adoramos becerros de ouro" e a expresión da cultura tradicional apenas encontra opcións para poder ser divulgada. "Esa é a nosa dor", sinalan dende a banda.
Pontevedra será, despois de Lugo, a segunda localidade na que A Quenlla presenta este novo traballo. A do Lérez, dixeron, é unha cidade "eterna, íntegra e sensible a estas cousas".