Seis producións internacionais abren con éxito o Festival Internacional de Curtametraxes de Bueu
Por Redacción
Non puido comezar mellor a sétima edición do Festival Internacional de Curtametraxes de Bueu. O Centro Social do Mar encheuse, en cada unha das dúas sesións programadas, de afeccionados a este pequeno formato audiovisual. Como viña sendo habitual nas anteriores edicións, as colas máis longas formáronse para o pase das 22.00 horas, polo que a organización recomenda acudir, se é posible, á sesión das 20.00 horas.
A curtametraxe mellor valorada no primeiro día do certame foi A Fábrica (Brasil, 2011), cinta dirixida por Aly Muritiba sobre unha nai que arrisca a súa seguridade para entregarlle un teléfono móbil ao seu fillo encarcerado. Á entrada de cada pase, os espectadores reciben unha papeleta para puntuar os títulos do día, que ao saír introducen nunha furna. Ao remate da semana, a obra máis votada farase co Premio do Público.
Ademais, os asistentes puideron gozar con outras pezas como La Fugue (A fuga), do director francés Jean-Bernard Marlin; a estadounidense Person to Person, de Dustin Guy; a curta animada francoarxentina Padre, de Santiago Bou; Catching a Lion (Atrapando a un león), unha coprodución croata e canadiana do director Vladimir Kanic e a cinta iraní Bashe Baraye Bad (Quizás en otra ocasión), de Amir Hossein.
As proxeccións do FICBUEU2013 continúan esta noite con con Lágy Esö (Poalla), coprodución entre Hungría e Bélxica dirixida por Dénes Nagy; a curta española Dinosaurio, do realizador Miguel S. Marín e mais a alemá Kellerkind (O neno do soto), de Julia Ockner. Pecharase a sesión con Electric indigo (Azul eléctrico), filme francobelga do cineasta Jean-Juliete Collette, e con Meu amigo Nietzsche, do brasileiro Fáuston da Silva.
O mércores comezará con 34.7º S (Francia), de Adriano Valerio, e con Molii (Francia), obra codirixida por Mourad Boudaoud, Carine May, Yassine Qnia e Hakim Zouhani. Seguiralle Canis (España), de Marc Riba e Anna Solanas, para continuar con Argile (Francia), do cineasta Michaël Guerraz, e pechar con Au sol (Francia), do realizador Alexis Michalik.
O programa completo e toda a información permanece ademais dispoñible na web www.ficbueu.com.
Relacionadas:
-
O filme francés La lampe au beurre de Yak gaña o Festival Internacional de Curtametraxes de Bueu
Por Redacción |
-
O FIC Bueu 2014 baixa o telón coa presenza de cineastas estranxeiros
Por Redacción |
-
Cinco curtametraxes europeas pechan as proxeccións da sétima edición do FIC Bueu
Por Redacción |
-
Directores galegos e internacionais debatirán sobre o cine no marco do FIC Bueu
Por Redacción |
-
O FIC Bueu aumenta este ano as cintas proxectadas en resposta ao aumento da participación
Por Redacción |