Portal 48 trae a Pontevedra "Ideografías", a primeira mostra do artista Iván Franco Fraga
Por Redacción
Portal 48 acollerá ata o próximo 5 de setembro unha mostra da obra do recoñecido artista Iván Franco Fraga. Despois de expoñer a súa obra en galerías internacionais tan prestixiosas como a National Portait Gallery (Londres) ou na Scottish National Portrait Gallery (Edimburgo), e cunha traxectoría artística sobresaínte, a obra deste artista de estillo hiperrealista desembarca en Pontevedra.
Os interesados na súa obra poderán gozar do traballo que o artista amosa na súa primeira exposición individual, Ideografías.
Ideografías engloba dous parámetros, a transcrición dos mitos a contemporaneidade e o cuestionamento da percepción a través do simulacro. A mostra pon en escena a narración a través do icono, o símbolo, o mito e os heroes. Figuras espectrais que só existiron na mente do ser humano e ás que lles da aparencia iconográfica.
Tras a inauguración da mostra, o propio artista ofrecerá unha charla-coloquio o 12 de agosto ás 20:00 horas, na que xunto co fotógrafo José Chas, comisario desta exposición, e todos os asistentes, poderá debater e afondar na gran cuestión artística sobre o papel da fotografía e a pintura.