"Blondys Coffee" de Entremans, no Teatro Principal
Por Oskar Viéitez
O Teatro Principal de Pontevedra acollerá este xoves 5 ás 21:00 horas o espectáculo de danza Blondys Coffee de Entremans, dentro do ciclo Pontevedra Escénica.
Dúas mulleres sumidas no tedio refúxianse en estraños pasatempos en busca de novas emocións que lles devolvan á súa propia natureza, un hábitat onde encontrarse elas mesmas coas súas miserias e as súas grandezas... unha viaxe polo labirinto da mente feminina.
Blondys Coffee: Peza longa para dúas mulleres, é un espectáculo de 50 minutos de duración en nove escenas, interpretada por Estefanía Gómez Cascudo e Beatriz Pérez facendo xogo con imaxes audiovisuais que afondan aínda máis a historia.
As pezas de Entremans realízanse xeralmente dende unha dirección artística colectiva, o que fai que non poida definirse como unha compañía ao uso, cun director artístico permanente, se non máis ben como un colectivo de artistas que se reúnen para a creación dunha nova peza, asumindo conxuntamente a creación artística e en determinados casos sinala un director específico para unha nova creación.