A Sociedade Filharmónica clausura a súa tempada de concertos coa Orquestra Cidade de Pontevedra
Por Redacción
O próximo mércores, día 14, a Sociedade Filharmónica de Pontevedra clausurará a súa tempada de concertos 2013-2014 (93 da súa historia), e farao, como vén sendo habitual nas últimas tempadas, coa actuación da Orquestra Filharmónica Cidade de Pontevedra. O concerto celebrarase no Teatro Principal e dará comezo ás 20:30 horas.
A Orquestra Filharmónica Cidade de Pontevedra fixo a súa presentación no ano 2007. Está formada por músicos cunha sólida formación, moitos deles con traxectorias profesionais xa consolidadas e outros en plena busca da madureza artística que só pode proporcionar o contacto directo coa mellor tradición sinfónica.
Na súa curta traxectoria profesional abrangueu un repertorio musical de moi diferentes estilos, e sempre colaborando cos novos compositores. Acompañou solistas de talle internacional, e recentemente, en colaboración coa plataforma "Musgafol", gravaron o seu primeiro CD.
O conxunto sinfónico pontevedrés, baixo a dirección do seu titular Javier Viceiro-Filgueira-Filgueira, ofrecerá aos socios da Sociedade Filharmónica o seguinte programa: Concerto para orquestra de corda, op. 17, do compositor portugués Braga-Santos; Quiet City, de Aaron Copland; Simple Sinfonía, de Benjamin Britten; e Danzas populares romanesas, de Béla Bartók.