2.500 nenos anótanse para ver os 'Trogloditas'
Por Redacción
A Fundación Novacaixagalicia presenta en Pontevedra, dende o 28 ao 30 de abril, Trogloditas, unha obra que foi merecedora do Premio María Casares ao mellor vestiario e mellor maquillaxe.
O bo quefacer dos compoñentes de Tanxarina Títeres, con máis de 30 anos de experiencia en teatro de monicreques, conseguirá que os máis de dous mil cincocentos nenos, procedentes de 44 escolas, que van asistir ás funcións, teñan a lembranza dun espectáculo inesquecible.
As funcións terán lugar ás 10.00 e ás 12.00 horas no Centro Social da fundación galega na cidade pontevedresa, localizado en Augusto González Besada, 2.
Neste proxecto didáctico, dirixido ao segundo ciclo de Educación Primaria, Tanxarina Títeres convidará os rapaces a entrar no primeiro teatro da prehistoria: unha cova chea de humor e tolería.
A través de monicreques de vara (canas de bambú) preséntase as aventuras de dous lanzadores de menhires, un levantador de pedras e un faquir que atravesa o seu corpo cun tronco, que farán a delicia do público escolar.
Na historia interveñen tamén, como actores, os tres personaxes condutores da representación. Coñecerán a través do humor e dos monicreques o modo de vida dos homes e mulleres das cavernas. A ambientación e a escenografía son sorprendentes e a linguaxe é moi orixinal, o que fará que os pequenos perdan durante a representación o sentido do tempo.