Aberto o prazo de inscrición para as bandas que queiran participar no 15 bolos
Por Oskar Viéitez
A Concellaría de Xuventude e o Local de música abriron estes días o prazo de inscrición para todas as bandas de Pontevedra que queiran aspirar a participar no 15 bolos, que volverá a desenvolverse durante as festas do verán.
Os 15 bolos consisten nunha serie de concertos que se celebrarán nas distintas prazas do centro histórico, do 28 de xullo ao 1 de agosto de 2014. Ten o obxectivo de dignificar a música que se fai en Pontevedra, segundo o concelleiro de Xuventude, Demetrio Gómez que este xoves presentou a convocatoria que rematará o vindeiro 30 de abril.
Os grupos serán seleccionados por un xurado cualificado e representativo. Poderán participar todas aquelas bandas ou solistas con compoñentes con idades superiores a os 16 anos e que polo menos un compoñente do grupo estea empadroado no Concello de Pontevedra.
A preselección consistirá nunha audición onde se presentará a reseña do grupo e revisarase o material solicitado de cada un dos grupos presentados.
O xurado valorará numericamente os seguintes criterios: actitude, composición e execución. Valoraranse especialmente a utilización da lingua galega e as composicións propias. A suma resultante destas valoracións e as de todas as persoas participantes como xurado darán o resultado da selección dos grupos para o día s dos concertos.
Terase en conta a calidade técnica e musical, a profesionalidade e consistencia do proxecto musical, a traxectoria e accións de promoción do grupo, e o estilo (hai cabida para todos, pero cada un terá o seu escenario).
A selección do xurado será o 2 de maio de 2014.