O Centro Dramático Galego representa en Pontevedra a obra cumio de Eugene O'Neill
Por Redacción
O Centro Dramático Galego representará o próximo sábado 12 de marzo Longa viaxe cara á noite no Centro Social da Fundación Novacaixagalicia de Pontevedra. A cita será ás 20.30 horas e as entradas están xa á venda a través das canles habituais da entidade, en www.servinova.com ou ben no despacho telefónico no 902 504 500.
Este espectáculo dirixido por Manuel Guede Oliva é a primeira ocasión en que o Centro Dramático Galego interpreta unha obra da literatura estadounidense nos seus 30 anos de historia.
Long Day's Journey Into Night (Longa viaxe cara á noite no título do espectáculo do CDG) está considerada unha das obras máis célebres da notable produción literaria de Eugene O'Neill, gañador de catro Pulitzer e premio Nobel de Literatura en 1936, a quen se considera o pai do teatro norteamericano moderno.
Aclamada pola crítica e considerada a obra máis completa e cumio de O'Neill, Long Day's Journey Into Night foi galardoada co premio Pulitzer póstumo ao ser editada pouco despois da morte do seu autor, a pesar de indicar que as súas pezas non debían publicarse ata 25 anos despois da súa morte.
Con elementos da vida do propio O'Neill, este texto narra a crónica dun só día na vida dos Tyrone, unha familia norteamericana quebrada polas frustracións e os vicios: James, un actor de éxito e fortuna, que pasou a súa vida de escenario en escenario sen poder formar un verdadeiro fogar; Mary, a súa muller, presa dunha adicción imposible de desarraigar; Jamie, o fillo maior e alcohólico; e Edmund, o alter ego de O'Neill, un mozo soñador e romántico, pero enfermo de tuberculose.