Lontreira e Dakidarría animarán o Festixeve, que volverá a Fragoso os primeiros días de agosto
Por Alejandro Espiño
O Campo de Vilar de Fragoso, en Santo André de Xeve, volverá ser o escenario dunha das principais apostas das Festas de Verán de Pontevedra. Volve o Festixeve, que chega á súa vixésimo sétima edición entre os días 1 e 4 de agosto.
Farao cunha programación chea de actuacións musicais, entre as que destacan os concertos que ofrecerán as bandas galegas Lontreira e Dakidarría o sábado 3 de agosto, na que será a xornada central deste novo Festixeve.
As actividades, que os organizadores confirmaron a través das súas redes sociais, comezarán o xoves 1 de agosto coa apertura das barras e, ás 22:00 horas, cos xa habituais cantos de taberna, que nesta ocasión correrá a cargo de Son das Corbaceiras.
Ao día seguinte, xunto co inicio da oferta gastronómica do festival, que volverá ter prezos populares, organizarase un xogo de rastrexo inspirado na serie televisiva El juego del calamar. Poderán participar equipos de entre seis e dez xogadores e as prazas serán limitadas.
O sábado 3, xunto cos concertos de Lontreira e Dakidarría, haberá pulpeiro a partir das nove da noite e o broche musical á noite poderao un DJ ata o peche da xornada.
Como colofón, o domingo 4 de agosto, haberá inchables e xogos populares despois de comer, desde as catro da tarde, ou a tradicional procesión laica de empanadas e roscas.
Ademais, o público poderá gozar das actuacións musicais de Pulpiño de Viascón (18:00 horas), Chispas do Lérez (19:30 horas) e a Charanga OT (21:00 horas).
O Festixeve, entre outros servizos, ofrecerá zona de acampada libre e duchas, unha feira de artesanía e diversas demostracións.
Relacionadas:
-
A música galega de Lontreira y Dakidarría sacia as ganas de troula no Festixeve
Por Mosrey Fotografía & Redacción |
-
A Praza da Pedreira, unha "magnífica sala de cine ao aire libre" cunha nova edición de "Cinema e estrelas"
Por Alejandro Espiño |
-
Senda Festival múdase á Illa das Esculturas para celebrar a súa terceira edición
Por Alejandro Espiño |
-
Mondra tamén estará nas Festas da Peregrina: actuará en Pontevedra o 16 de agosto
Por Alejandro Espiño |
-
Malvela, nova incorporación a Con voz de muller: actuará en Pontevedra o 4 de agosto
Por Alejandro Espiño |
-
Guadi Galego e Dakidarría, primeiros nomes para a oferta musical das Festas de Verán
Por Alejandro Espiño |