Cinco librerías da provincia participan no programa 'Afinidades Electivas' do Ministerio de Cultura
Por Redacción
Dúas librerías situadas no centro urbano de Pontevedra, Seijas e Paz; ademais de Miranda, de Bueu; Libros para Soñar, de Vigo; e Arte Ciencia, de Mos, converteranse en recintos de encontros literarios dentro do programa 'Afinidades Electivas', que promove o Ministerio de Cultura.
Abel Losada, subdelegado do Goberno, felicitaba este venres a todos estes espazos privados pola súa incorporación a esta iniciativa, que potencia a autores e autoras en todas as linguas oficiais do Estado.
No caso de Galicia, todos os autores contan con obra publicada en galego.
O representante gobernamental visitaba a librería Miranda, de Bueu, un establecemento histórico que se converte así nun dos 15 escollidos en Galicia.
O programa na provincia iníciase o xoves 4 de xullo na librería pontevedresa Seijas. As ilustradoras Esther Gili e Nuria Díaz conversarán sobre os seus últimos traballos e o seu proceso creativo.
O 27 de setembro, Antonio Manuel de la Santísima Trindade e Noemí Vilamuza acudirán a Libros para Soñar para manter un encontro co público.
A librería Miranda será protagonista o 28 de setembro cos poetas Mario Obreiro e Miriam Ferradáns.
Xa o 5 de outubro, a librería Arte e Ciencia, de Mos, será escenario do encontro entre Andrea Maceiras e Ramón Domínguez.
Por último, o 26 de outubro pecharase o ciclo na librería Paz, de Pontevedra, co evento protagonizado pola escritora viguesa Silvia Penas e Aitor Romero.