As "cancións para bailar" de Santi Araújo soarán no Museo de Pontevedra
Por Alejandro Espiño
O claustro do Edificio Sarmiento acollerá o vindeiro sábado 29 de xuño o concerto co que o artista Santi Araújo presentará en Pontevedra o seu último disco, titulado Canciones para bailar.
Este concerto no Museo de Pontevedra, que comezará ás sete da tarde, será de entrada gratuíta. O acceso será mediante reserva previa, escribindo a reservas.museo@depo.gal, a partir do 18 de xuño.
Despois de Suelta Ø Muerde, o seu disco de debut de 2022, Santi Araújo acaba de publicar Canciones para bailar, un segundo álbum que evidencia a súa capacidade para explorar novos rexistros máis desenfadados sen perder a súa identidade de ourive.
Gravado integramente en cinta, este disco ofrece unha viaxe a través de catorce cancións que van desde a bossanova e o folk ata a psicodelia, acompañadas do seu característico fraseo.
Santi Araújo (Ponteareas, 1993) deuse a coñecer co proxecto de folk pop La Familia, que deixou como testo o disco Esto eres normal (2011).
Tras unha tempada en México, sete anos despois reapareceu co seu primeiro EP en solitario, Catedral. O seu último disco defínese como un traballo moi persoal, repleto de alegría e soltura, que se aprecia desde os seus primeiros adiantos: Bailar, Jilguero e Piedra del camino.