As mellores instantáneas de 70 fotoxornalistas galegos
Por Oskar Viéitez & Mónica Patxot
O vestíbulo do Pazo Provincial ten aberta deste este luns a exposición fotográfica "A Galicia inédita. Unha ollada diferente do fotoxornalismo galego", organizada pola Asociación de Periodistas de Galicia (APG) e o Colectivo Profesional de Fotoxornalistas de Galicia.
Este luns tivo lugar a inauguración da man do presidente da Deputación, Luis López; a presidenta da APG, María Méndez; coordinador do Colectivo Profesional de Fotoxornalistas de Galicia, Miguel Riopa; e Fernando Blanco, comisario da mostra, que ven de acadar máis de 11.000 visitas no seu período de exposición ao público en Santiago de Compostela.
A exposición reúne 73 fotografías -inéditas ou publicadas- doutros tantos reporteiros gráficos que traballan en Galicia, acompañadas por lendas de corte literario, elaboradas por xornalistas que tamén desenvolven o seu labor na nosa comunidade autónoma.
"A Galicia inédita" xurdiu dos encontros que mantiveron previamente a Asociación de Periodistas e o Colectivo de Fotoxornalistas, que concordaron no obxectivo común de poñer en valor o traballo dos fotógrafos de prensa en Galicia, sen perder o nexo de unión cos profesionais que ilustran os seus textos coas imaxes dos primeiros.
As fotografías que se expoñen na mostra son imaxes que van máis aló da capacidade creativa dos seus autores e da instantánea de actualidade, con obras que plasman moi diferentes aspectos da nosa realidade social, económica e política, dende a vertente máis dura ou crúa (lumes forestais, narcotráfico, conflitos laborais…), ata as manifestacións artísticas, culturais e festivas galegas; malia que tamén inclúe moitas que reflicten a beleza paisaxística ou a xeografía humana da comunidade.
Serve ademais como plataforma para inmortalizar as escenas que os xornalistas entenden como máis representativas e tamén inéditas desta área xeográfica e mostralas ao resto da sociedade.
"A Galicia inédita. Unha ollada diferente do fotoxornalismo galego" estará aberta ao público, con acceso libre, ata o próximo 28 de xuño no Pazo Provincial, de luns a venres en horario de 9,00 a 20,00 horas.