Invitación a usar o galego como vehículo de unión
Por Mónica Patxot & Anxo Lourido
O acto institucional da Deputación de Pontevedra arredor de Luisa Villalta, escritora á que se dedica o Día das Letras Galegas, desenvolvíase este xoves no vestíbulo do Pazo Provincial.
A académica e escritora pontevedresa Fina Casalderrey, a xefa do departamento de Lingua e Literatura do IES Sánchez Cantón de Pontevedra e a alumna do centro Agustina Ayelén Mallo realizaron lecturas de textos e poemas de Luisa Villalta ante a presenza de numerosos estudantes.
Luis López, presidente da Deputación, recoñecía o seu orgullo persoal por ser "galego falante" afirmando que "de neno, na escola, na rúa ou na casa, falaba galego. Cando crecín, formei a familia e atopei traballo, seguín falando galego. E agora, que teño a honra de presidir esta Deputación sigo falando galego. Seguirei falando galego sempre porque é como o meu nome ou as miñas raíces, parte de min".
"Manter viva a nosa lingua é manter viva Galicia e a nosa cultura", apuntaba o presidente para, a continuación, indicar que o goberno provincial establece unha liña de axudas para realizar publicacións en galego e coopera con entidades como a Real Academia Galega. O presidente provincial aproveitou para invitar a cidadanía a empregar o galego como vehículo de unión.
Tamén anunciaba un acordo de colaboración co colectivo Oral de Galicia para realizar obradoiros de regueifa en centros educativos, actividade que vai desenvolverse a principios do vindeiro curso coa intención de combinar a lingua co humor e a improvisación.
Jorge Cubela, deputado de Cultura e a directora do Museo de Pontevedra, Ángeles Tilve, tamén realizaron a lectura de textos da autora luguesa. O acto completábase coa actuación musical do cuarteto de corda do Conservatorio de Música Manuel Quiroga e a interpretación do himno galego.