A Deputación celebra o Día do Libro cun espectáculo de contacontos e actividades de divulgación da lectura
Por Oskar Viéitez & Mónica Patxot
A Deputación de Pontevedra celebrou este martes 23 de abril, o Día do Libro cun espectáculo de contacontos ao que asistiron escolares de primeiro ciclo de Primaria do colexio Froebel desta capital.
O vestíbulo do Pazo provincial foi decorado con estantes cheos de libros, contos e ilustracións infantís, así como coxíns no chan onde sentaron os nenos para desfrutar das historias de Caxoto e do ilustrador Marc Taeger, que interpretaron a dous simpáticos pintores que encheron de risas e cor a sede institucional.
O presidente da Deputación de Pontevedra, Luis López, animou a descubrir "os segredos que agochan os contos". "Cando sexades maiores ídesvos lembrar sempre do primeiro libro que lestes", díxolles aos escolares.
López recomendou dous libros moi especiais elixidos polos seus fillos: "Adivina cuánto te quiero" e "Fiz, o coleccionista de medos". Tamén o deputado de Cultura Jorge Cubela realizou a súa achega animando a ler "A Galiña Azul", de Carlos Casares.
Cubela puxo en valor a importancia das librarías como eses "espazos tan bonitos cheos de historias e aventuras".
A Deputación complementa este acto coa posta a disposición da cidadanía da provincia dun espazo na páxina web do organismo provincial cos mellores libros infantís que recomendan as editoriais de Galicia, así como unha actividade titulada "Crea o teu primeiro libro" para que os máis pequenos da casa xoguen a ser escritores e a escribir as súas primeiras historias.
"A Deputación é a casa de todos os pontevedreses e pontevedresas, pero tamén é a casa dos libros", concluíu Luis López para explicar á cativada para que serve a Deputación de Pontevedra.
Ademais, a xornada rematou cunha lectura conxunta dunhas pasaxes dos libros favoritos do alumnado.
Relacionadas:
-
O alumnado de sexto de Primaria do CEIP Carballal obtén o carné de ciberexpertos
Por Oskar Viéitez |
-
O PSOE acusa de deslealdade ao PP por non recibir na Deputación a 15 alcaldes socialistas
Por Oskar Viéitez |
-
"Unha dorna de libros" recalará en Marín para desembarcar "un mar de ilusión"
Por Redacción |
-
BDra Gráfica encherá as rúas da cidade en xuño de figuras internacionais do cómic
Por Mónica Patxot & Anxo Lourido |
-
Alumnado dos colexios de Cerdedo-Cotobade, A Lama e Fornelos, celebrarán conxuntamente o Día do Libro
Por Oskar Viéitez |
-
'A desCuberta dos libros', a proposta coa que a Deputación se suma ao Día do Libro
Por Redacción |
-
O espectáculo 'Memorias dun neno labrego' de Candido Pazó abre tres días de Feira do Libro en Soutomaior
Por Redacción |