Os cociñeiros con Estrella Michelín serán nomeados embaixadores de Rías Baixas
![Alejandro](/web/cache/scene/uploads/xornalistas/foto/dee/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5624216432-20150128-patxot-alex-espino-002.jpg)
Por Alejandro Espiño
Os responsables dos sete restaurantes que teñen Estrela Michelín na provincia de Pontevedra serán os embaixadores das Rías Baixas durante o ano 2021. Así o anunciou a presidenta da Deputación, Carmela Silva, na presentación dunha nova edición da Gala Provincial do Turismo.
Nesta gala, que será o 24 de marzo en Vigo, recibirán esta honra Pepe Solla (Casa Solla), Iñaki Bretal (O Eirado), Pepe Vieira (Pepe Vieira), Yayo Daporta (Yayo Daporta), Javier Olleros (Culler de Pau), Rafa Centeno e Inés Abril (Maruja Limón) e Alberto González Prelcic (Silabario).
Será, segundo Carmela Silva, un evento "dinámico, con música e con moitas sorpresas" que estará presentado pola actriz Celia Freijeiro. Nel, recibirán os seus diplomas de calidade do SICTED representantes de 136 empresas turísticas da provincia.
"Queremos mostrar todo o noso apoio ao sector do turismo, o comercio e a hostalería, que ten sufrido un enorme impacto económico, e cremos que este é o momento para homenaxealos e prepararnos para saír desta situación con máis forza", explicou Silva.
A campaña deste ano, "Momentos Rías Baixas", será o fío condutor da gala, que ofrecerá unha viaxe pola provincia e xirará en torno a diferentes experiencias, entre elas a gastronómica nun dos restaurantes que, a partir de agora, serán embaixadores oficiais da provincia.
Todos eles, destacou a presidencia provincial, son o "buque insignia" da gastronomía pontevedresa e sitúan ás Rías Baixas "na vangarda internacional" a partir de pratos nos que "hai un respecto e coidado ao produto" que extraen do mar, da terra e os viñedos miles de produtores, mariscadoras, gandeiros ou agricultores.
Pepe Solla tomou a palabra en nome dos seus compañeiros para agradecer este nomeamento e apuntou que o recoñecemento da súa cociña "é un traballo de todas as persoas que están detrás de nós". Pola súa banda, Iñaki Bretal anotou que "é o momento de axudarnos entre todos a dar xuntos o mellor de nós e facer un destino aínda máis sostible e de calidade".
Os cociñeiros recibirán durante a gala como recoñecemento unha peza de artesanía creada por Ana Tenorio, premio Artesanía de Galicia 2018, e inspirada na camelia das Rías Baixas.
Carmela Silva fixo fincapé en que na gala aplicaranse todos os protocolos fronte á covid-19, cumprindo "exhaustivamente" as medidas de seguridade, tanto de limitación de aforo como de distancia entre as butacas.
As fotos de familia dos distintos grupos faranse por quendas reducidas, e a asistencia tanto dos premiados como dos alcaldes, alcaldesas e demais autoridades, será con invitación e confirmación expresa para garantir que se cumpre o aforo.
O evento poderá seguirse en streaming na páxina web da Deputación de Pontevedra e a través das redes sociais.
Relacionadas:
-
O asador no que Pepe Vieira cociñará "a fuego"
Por Alejandro Espiño & Mónica Patxot |
-
Javier Olleros, un "activista do verde" premiado como Cociñeiro do Ano en Madrid Fusión
Por Alejandro Espiño |
-
As máscaras éticas chegan á cociña galega
Por Alejandro Espiño |
-
A Gala do Turismo rende homenaxe ao "traballo e sacrificio" do sector
Por Oskar Viéitez |
-
"Momentos Rías Baixas", unha campaña adaptada á evolución das posibilidades de viaxar
Por Oskar Viéitez & Mónica Patxot |
-
Iñaki Bretal, chef 'estrela' de O Eirado: "É algo que Pontevedra merecía. É bo para todos"
Por Alejandro Espiño & Mónica Patxot |
-
Javier Olleros, tras recibir dúas Estrelas Michelin: "Galicia é o lugar que me permite ser o que son"
Por Alejandro Espiño & Mónica Patxot |
-
Iñaki Bretal logra para O Eirado a primeira Estrela Michelin para un restaurante de Pontevedra
Por Alejandro Espiño |
-
Culler de Pau, primeiro restaurante de Galicia que obtén dúas Estrelas Michelin
Por Alejandro Espiño |