Algo se move no sector da construción
Por Oskar Viéitez
Os datos que obran na oficina de Urbanismo amosan unha "esperanzadora reactivación da construción na cidade", segundo salientou este martes en rolda de prensa a concelleira Anabel Gulías.
Ademais da tramitación de dous novos supermercados, un Gadis na rúa Oliva e un Eroski na avenida de Lugo, pendentes o primeiro do informe municipal e o segundo de que a promotora envíe a información definitiva para a concesión da licenza, rexistráronse outras obras maiores.
Impúlsase unha edificación na rúa Carrasqueira para restaurante (entre rotonda de avenida de Lugo e San Amaro), dúas rehabilitacións na rúa Oliva para 4 vivendas e outra para 3 vivendas, un edificio en Joaquín Costa con Doce de novembro para 26 vivendas e un edificio en Joaquín Costa con Doce de novembro para 40 vivendas.
Tamén se ten constancia dun edificio na esquina da rúa A Estrada, cara Pintor Laxeiro, para 31 vivendas, un edificio na esquina Pintor Laxeiro con Juan Carlos I para 44 vivendas, un edificio en Echegaray para 11 vivendas (fronte a entrada das antigas urxencias do ambulatorio), a reforma dun edificio na rúa Alemaña 44 para 3 vivendas ou a unha rehabilitación na rúa Riestra para 4 vivendas.
A elas súmase un edificio no Gorgullón (próximo á rúa do Muíño) para 6 vivendas, para vivendas turísticas, unha iniciativa totalmente nova na cidade, e nas parcelas de Tafisa, o Concello está a tramitar o estudo de detalle dunha das parcelas na que se poderán construír ao redor de 250 vivendas, e está á espera de que unha nova promotora presente a solicitude de licenza que xa ten solicitada no Concello.